[信用卡迎新攻略] 零成本賺迎新信用卡大全 – 玩電子錢包就簽完！

#零成本食信用卡迎新 #0成本食迎新 #無成本食迎新 #現金回贈信用卡迎新 #電子簽包簽迎新 #信用卡迎新懶人包 #Citi信用卡零成本食迎新 #安信信用卡零成本食迎新

想知邊幾張卡最好用？即睇最佳現金回贈信用卡組合！

（最後更新：2021年9月）

玩信用卡現金回贈，永遠賺得最快都一定係迎新嗰浸；所以如果想賺盡回贈，就要狂開卡食迎新！更加筍嘅係，部份信用卡嘅迎新係可以無成本「自製簽賬」玩電子錢包就食到！即係只要開張卡，攞部手機定時㩒幾個制，就可以輕鬆chok到一千幾百現金回贈出嚟！呢個世界，真係有咁大隻蛤乸隨街跳㗎！留意返，以下所列迎新及額外獎賞大部份都唔適用於學生，未出嚟做嘢嘅話可以睇返返學生信用卡迎新大全。

迎新資格

多數嘅銀行／金融機構，都只係會俾全新信用卡客戶食迎新，即係你喺銀行本身有A信用卡，再喺同一間銀行開埋B信用卡係唔會有迎新賺。美國運通係少數迎新逐張卡計嘅金融機構，可以逐張食；而滙豐嘅信用卡就會另外有個少一截回贈嘅現有客戶迎新（迎舊）。另外留意返，學生通常會有個簽賬額細啲嘅學生迎新，係同普通客戶唔同。

監期&冷河

留意返，開完卡食迎新之後，好多銀行都會規定要等12／13個月先可以cut卡，如果唔係銀行有權會收返你手續費，我地姑且叫呢段時間做「監期」。同時，多數銀行嘅迎新都會要求客戶開卡之前嘅半年／一年唔可以擁有過佢嘅信用卡，我地姑且又叫呢段時間做「冷河」。當你開完張新卡食完迎新，首先過咗監期就可以cut卡，然後就再要等過冷河，跟住就可以loop多次再申請過張卡，再嚟食迎新啦！

零成本食迎新

隨住各個電子錢包都已經幾普及，可以玩電子錢包無成本食迎新嘅信用卡已經買少見少，而各個電子錢包可以玩嘅金額亦都不斷減少；所以要玩埋呢轉尾水就要快手啦！市面上咁多間銀行之中，以Citi嘅信用卡迎新最闊綽，Payme、支付寶、微信、O!ePay全部都計做合資格簽賬。而其他有啲銀行嘅信用卡就可以用O!ePay玩八達通自動增值食到迎新。

四大電子錢包之中，以Payme嘅玩法最簡單，直接入信用卡number落去增值就搞掂，增值完就可以FPS轉賬返去自己銀行戶口；但依家Payme信用卡增值嘅限額已經減到得返每個月$1,000。之後支付寶同微信支付嘅玩法就非常類似，都係要透過轉賬俾朋友嘅功能，揀返由信用卡扣錢嚟chok簽賬額，再搵朋友FPS轉賬返銀行戶口；但依家支付寶同微信支付嘅每月信用卡免手續費轉賬限額，亦已經減到每個月$1,000（身份證驗證後）。最後最複雜，但亦都係chok到最多錢嘅O!ePay，就係透過一張link咗信用卡自動增值嘅八達通，每日拍卡入錢落個App到嚟trigger自動增值chok簽賬額；每個月最多可以玩到成$10,000，詳細可以睇返呢篇O!ePay攻略。

電子錢包零成本食迎新示範
由於Payme、Alipay HK同WeChat Pay HK嘅每月信用卡增值／轉賬限額都減到得返$1,000，所以玩呢3個電子錢包係唔夠簽晒$10,000食迎新，但都可以用嚟簽到一大半。如果想真正零成本簽晒$10,000，就要開八達通自動增值，然後每日嘟$500入O!ePay個App，玩20日就可以簽晒$10,000，再分期轉返啲錢入銀行戶口，詳細可以參考O!ePay攻略。

零成本食迎新現金回贈信用卡大全

以下呢個表，基本上已經有齊晒全香港可以零成本食迎新嘅現金回贈信用卡資料（其他信用卡迎新可以睇返信用卡迎新大全），大家可以睇住嚟開卡chok迎新。由於版面位置有限，以下迎新及額外獎賞資料只係簡略概述，開卡前請先Click入信用卡攻略睇返詳情。以下所有迎新／額外獎賞均受信用卡攻略／官網所載之詳情與條款及細則約束。

[為確保你賺到經本網成功申請額外迎新（如有），請確保你無封鎖跨網站追蹤（Safari預設會封鎖，建議用Chrome）、無封鎖cookie、無用緊incognito無痕模式、已暫停／關閉AdBlock，同埋避免用公司／公用電腦申請。Click咗條link之後，請盡快完成申請，中間盡量避免開其他網站。]