點樣找卡數？PPS繳費靈/FPS轉數快/自動轉賬交信用卡卡數教學攻略

#上網找卡數教學 #PPS找卡數教學 #轉數快找卡數 #FPS找卡數 #自動轉賬交卡數

（最後更新：2020年7月）

開完第一張信用卡，好多人會問嘅第一個問題，就係點找卡數。小編都有朋友因為唔係好識找卡數，而只會用本身有銀行戶口間銀行嘅信用卡，甚至每個月去寫支票找卡數。依篇文就同大家講下究竟有啲咩方便啲嘅找卡數方法，等大家以後唔使再寫支票或者去櫃員機入錢咁嘥時間。

PPS 繳費靈

雖然PPS呢樣嘢聽落有啲old school，但小編認為用PPS找卡數仍然係最方便最簡單嘅選擇，包括小編自己大部份嘅卡數都係用PPS個App去俾錢。只要一開始麻煩少少落街setup咗個戶口，以後就靠個App可以搞掂晒所有信用卡。

想用PPS找卡數，首先就要攞張銀行提款卡去OK便利店搵部PPS機開咗戶口先（太細間嘅OK可能會無）。開完PPS戶口之後，你個銀行戶口就會連落咗落PPS到，以後你用PPS交錢佢就會直接喺你銀行戶口扣數。開PPS戶口嘅詳細教學，可以睇返下面條片或者PPS網站。

開完咗PPS戶口之後，你就可以揸住張收據，上PPS個網用返個戶口號碼同密碼登入，然後改過個帳號名方便下次用。登入咗之後，你就可以入去「登記賬單」，打返銀行名同信用卡號碼，將信用卡戶口綁落PPS戶口到。咁以後你每次要再找呢張卡嘅卡數，只要上PPS個網或者用PPS個App（iOS | Android），揀返交邊張卡同打返個銀碼就搞掂啦！勁方便！詳細教學可以睇返下面或者PPS網站。

雖然佢個App嘅UI好似時光倒流10年咁，但暫時最簡單又可以交到晒所有信用卡卡數嘅方法就剩係得佢！小編個人習慣，平時一收到SMS／email話有月結單之後，就會盡快入銀行個App去睇，check完無問題就即刻用PPS俾錢，咁就唔驚交漏卡數啦！或者亦可以每次出糧就逐個銀行App開一次去找數。記住係要交返張statement右上角個「總結欠」，要full pay找卡數呀！留意返用PPS俾錢嘅話，都要預留返一兩個工作天嘅時間先會到賬，所以千祈唔好咁炆交錢呀！

FPS 轉數快

跟住講呢一樣先進啲，就係用FPS轉數快，直接好似銀行戶口過數咁轉賬落信用卡戶口到找卡數。呢個功能暫時唔係間間銀行都做到，比較好用嘅係恒生、ZA Bank。只要喺銀行App入面揀「轉賬」，然後打信用卡number就可以找卡數，但就唔支援安信、AEON等財務公司嘅信用卡。

自動轉賬

如果你厭每個月找卡數太麻煩，或者驚大頭蝦唔記得找卡數，咁就可以諗下用自動轉賬去交卡數。如果想用自動轉賬交卡數，咁就要傳統啲咁去信用卡間銀行攞份form，填完簽埋名再寄返銀行或者交去分行。雖然個過程係幾麻煩，但就可以一勞永逸。

呢張form通常叫做「Direct Debit Authorisation 直接付款授權書」，有啲銀行寄張信用卡俾你嘅時候會順便攝埋張form入去，如果無嘅話就要上銀行官網搵，都搵唔到就要打電話問或者去分行攞。呢張form會預先填好咗信用卡銀行個收款戶口資料，你要做嘅嘢就係填返自己銀行戶口同信用卡資料落去，揀返還100%卡數，跟住就可以寄去或者交返去信用卡間銀行。

仲有要留心返，呢張form寄咗去銀行之後，係要process一大輪先會生效。喺佢正式生效之前，你係要繼續用返其他方法去交卡數。當佢正式生效到之後，張信用卡月結單最底會印住句嘢，話銀行會自動喺你銀行戶口扣數，咁你先真正唔使再自己去交。

小編個人習慣，就只有最常用嗰幾張卡先會用自動轉賬，其他都係用返PPS交。同埋大家千祈唔好恃住有自動轉賬就唔睇信用卡月結單，如果唔係嘅話俾銀行收咗年費甚至被人盗用都唔知就慘！

小結

睇完上述交卡數嘅教學，咁就唔使再因為唔識交卡數而唔敢開信用卡啦！即刻去睇下呢篇最佳現金回贈信用卡組合同必食信用卡迎新大全啦！