八達通App(O!ePay)教學攻略 – 自動增值chok回贈！零成本食迎新！交稅1.5%回贈大法！

#好易畀教學 #八達通自動增值刷回贈 #八達通自動增值刷迎新 #O!ePay刷分 #O!ePay刷回贈 #零成本食迎新 #0成本食迎新 #O!ePay八達通繳費交稅

（最後更新：2024年1月）

可能好多人都未必知，其實八達通有個電子錢包App叫O!ePay（啱啱改咗名做八達通App），可以孖住八達通嚟用。O!ePay有個好獨特嘅功能，就係可以用八達通卡嘟卡，將八達通入面嘅錢轉入O!ePay隻App度。如果你張八達通唔夠錢嘅話（例如入面得$100蚊但你要嘟$500），呢個過程就會trigger到八達通自動增值，從而喺你張信用卡到扣數，咁你就成功「自製」簽賬，用信用卡簽到錢去賺回贈！而嘟咗入個App入面嘅錢，除咗可以轉數快出返自己銀行戶口之外（但有限額），亦可以攞嚟繳費同交稅！即係變相交稅都有1.5%回贈！

如果用八達通自動增值最高回贈，有成1.5%嘅渣打Simply Cash去計，每嘟一次張八達通過$500入App就有$7.5回贈（可以參考返呢篇八達通自動增值信用卡比較）！

玩法

1. Down咗八達通個App開account，然後交身份證同地址證明升級做「好易畀Pro」
2. 申請信用卡、買八達通
3. 信用卡到手後，申請八達通自動增值，並將八達通加入O!ePay個App
4. 八達通自動增值申請成功後，App會彈通知，入App啟動自動增值
5. 每日嘟八達通入$500落App，咁張信用卡就每日碌咗$500嚟賺回贈
6. 透過FPS過數將O!ePay餘額過返去銀行戶口（留意下文限額）／繳費／交稅

要玩到呢個chok回贈大法，首先當然係要down咗個App先（Android｜iOS）。Down完個App之後，就開account，然後搵升級帳戶升做「好易畀Pro」；由於法例要求，呢個升級過程中要交身份證同地址證明，同埋要等八達通嗰邊人手審批。當你收到email話審批完成嘅時候，就正式可以開始chok錢！（有關帳戶問題可參閱官網FAQ）

準備好O!ePay個帳戶之餘，當然仲要準備埋張八達通同信用卡！如果係用嚟刷迎新嘅話，小編會建議去地鐵客務中心買過張新嘅租用版八達通，玩完等三個月就可以返客務中心退卡（留意如果開卡後90日內退卡、或車費／零售交易少於5次，退卡要俾$11手續費），咁就唔使次次俾$20手續費轉自動增值信用卡，乾手淨腳！有咗張八達通同信用卡後，就要去申請八達通自動增值，呢樣就每間銀行申請嘅方法都唔同，但多數都可以上網申請，詳細每間銀行嘅申請方法可以對返官網。同埋記得要揀個自動增值金額做$500呀，千祈唔好揀咗$250同$150！

升級完個account，又申請完自動增值，就可以入返個App度加咗張八達通落去先。首先去更多>管理八達通卡，然後㩒登記入資料，再拍張八達通落去就搞掂。如果你一遞交完自動增值申請就即刻加定張八達通入個App度嘅話，到自動增值批咗嘅時候，個App就會彈通知叫你可以啟用自動增值，咁就唔使慢慢等佢封信寄到嚟先玩得。

啟用咗自動增值之後，就可以開始chok回贈／迎新啦！由於每張八達通每日最多只會自動增值一次，所以我哋要做嘅嘢就係每日過$500落個App去trigger自動增值，咁我地張信用卡就每日簽到$500！只要㩒「轉入」，然後揀用八達通，再入金額嘟卡就搞掂。例如你張新信用卡個迎新係要簽$8,000，咁你只要玩16日每日入$500落去，就可以無食本食迎新啦！「好易畀 Pro」每個月最多可以由八達通入$10,000落個App度，即係最多可以玩20日。

咁轉完啲錢入個App度，又點樣可以攞返出嚟？只要㩒返「P2P畀錢」，然後入銀行號碼，就可以將個App入面嘅錢轉返入自己銀行戶口啦！現時O!ePay每個月用FPS轉出款項嘅頭$3,000係唔收手續費，其後就收1%手續費，但如果你用1.5%回贈嘅渣打Simply Cash，其實玩過咗$3,000都一樣可以有賺！

如果想玩多過$3,000但又唔想俾手續費轉返啲錢出嚟，亦都可以用入面啲錢嚟交水費、差餉地租同交稅，咁就連1%手續費都慳埋（繳費教學見官網）！留意返，每個人名下最多只係可以有3張自動增值嘅八達通，而係每間銀行最多只係可以有1張自動增值八達通。

八達通增值現金回贈／迎新表