Citi Debit Card攻略 – 多貨幣扣賬卡、迎新1%現金回贈！

#花旗Citibank Debit Card #花旗Citibank扣賬卡提款卡 #Citi Debit Card卡優惠 #Citi Debit Card現金回贈  #Citi Debit Card好唔好 #Citi Debit Card年費豁免 #Citi Plus Debit Card #Citi Priority Debit Card #Citigold Debit Card

想開Debit Card又唔知開邊張好？即睇Debit Card攻略！

（最後更新：2021年7月）

Citi嘅Debit Card，可以話係有虛擬銀行之前香港唯一一張稍為多人認識嘅Debit Card。Citi旗下其實每個戶口級別，包括Citi Plus、Citi Priority同Citigold都有張自己嘅Debit Card，但實際用起上嚟都係無咩分別。Citi嘅Debit Card主打支援多種貨幣，要用外幣嘅時候可以直接扣返銀行入面個外幣戶口；而且消費有0.5%現金回贈，而迎新期仲有1%現金回贈！

香港一向都無咩銀行搞Debit Card，但其實呢樣嘢喺外國係好興。所謂Debit Card，就即係碌卡嘅時候會類似EPS咁直接扣你銀行存款（Debit Card詳解），而唔係當喺銀行借錢，咁就少咗卡數呢個煩惱。而呢張多貨幣扣賬卡，只要啟動咗「Citibank Global Wallet 」之後，就更加識自動扣返相應外幣戶口嘅存款：例如如果你一早喺銀行唱落咗一堆yen，咁喺日本網掃貨，或者去旅行喺日本碌卡／㩒錢嘅時候，張卡就會自動喺日元戶口扣數。

呢張Debit Card只要喺Citi戶口客戶就開得，包括學生都無問題，亦唔使交任何文件。如果開戶嘅時候佢無跟埋俾你嘅話，只要入返手機流動理財或者網上理財，就可以即刻開到卡。

Citi Debit Card卡賣點

• 本地簽賬0.5%現金回贈（開卡首6個月更可享1%回贈）
• 支援12種貨幣
• 全球Citi櫃員機提款免手續費（海外提款攻略）

Citi Debit Card無論係本地同網上簽賬，都有0.5%現金回贈，開卡首6個月更加有1%回贈。

而只要啟動咗「Citibank Global Wallet 」之後，呢張卡仲可以支援港元、美元、英鎊、日元、人民幣、歐元、泰銖、澳元、新西蘭元、新加坡元、加拿大元及瑞士法郎共12種貨幣，只要你銀行戶口入面有相應外幣佢就會識自動扣，而如果無／唔夠嘅話佢就會轉用港紙結算。如果係喺本身相關外幣戶口有足夠結餘嘅情況之下作外幣簽賬，因為簽賬過程無須作外幣兌換，更加係無手續費淨賺0.5%回贈！所以以後去旅行只要喺Citi戶口唱定錢，直接碌呢張卡扣外幣，喺大多數情況下係會抵過去找換店唱錢（但識玩嘅話碌信用卡仲抵，可以睇返海外簽賬信用卡攻略）。

注意事項

• 無咩優惠，平時得0.5%現金回贈

張卡本身0.5%現金回贈，就算開卡頭6個月都係得1%，同信用卡比就一定輸蝕，所以簽本地簽賬就真係唔會揀佢（最抵現金回贈信用卡攻略）。尤其係呢排啲虛擬銀行嘅Debit Card勁多優惠（Debit Card攻略），呢張卡拍埋去比就真係無咩誠意。

Citi Debit Card小檔案

• 本地簽賬：0.5%回贈（開卡首6個月1%回贈）
• 海外簽賬：同上（以港幣扣賬1.95%手續費，以外幣直接扣賬無手續費）
• 年費：永久免年費
• 開戶要求：Citi戶口客戶

*受條款及細則約束