拆解海外簽賬DCC / CBF手續費陷阱！網購都會中招！酒店網、Airbnb、App Store、Netflix、Spotify最高危！

#App Store、Google Play、Netflix、Spotify、Airbnb信用卡1%手續費 #動態貨幣轉換 #海外簽賬手續費 #外幣簽賬手續費 #Dynamic currency conversion #動態貨幣交易 #Cross Border Fee #跨境港幣交易手續費

（最後更新：2024年11月）

今次呢篇文，就同大家拆解下海外商戶DCC動態貨幣轉換，同埋CBF跨境港幣交易，呢2個碌卡手續費陷阱！

外幣簽賬有手續費，相信好多人都知，但市面上信用卡頂到盡都只係會收2% FCC手續費，所以只要搵張高回贈嘅信用卡簽就已經可以賺突，詳細可以睇返海外簽賬信用卡攻略。但好多人就為咗避免呢個手續費，會揀用港幣嚟去海外商戶簽賬／網購，咁就好大機會中伏啦！

呢個DCC/CBF陷阱，以下會分兩part拆解，分別係海外實地簽賬（即係去旅行嗰時喺外國鋪頭簽卡）嘅DCC陷阱，同埋海外網上簽賬（即係Netflix、Spotify、Airbnb呢啲）嘅CBF陷阱。實地就可能中DCC，網上就可能中CBF。

海外實地簽賬（DCC陷阱）

簡單嚟講，去旅行喺外地商戶碌Visa/Mastercard嘅時候，可以揀用外幣或者港幣結算交易，而以港幣結算嘅交易就叫做Dynamic currency conversion (DCC) 動態貨幣交易。驟眼睇落，用港幣結算好似幾好；但其實商戶同銀行一般夾埋會向DCC交易收返最少4%嘅手續費，遠高於外幣簽賬嘅2%手續費！所以，喺外地碌卡嘅時候，一定要以外幣直接結算，千祈唔好墮入DCC陷阱！一般嚟講，只要喺俾錢嘅時候同個店員講以當地貨幣埋單（Pay in USD/EURO etc.），就可以避免到DCC陷阱，而簽完之後張機單係唔應該會見到有港幣。

海外網上簽賬（CBF陷阱）

啱啱講完海外實地簽賬嘅DCC陷阱，呢part就講網上喺海外網站簽賬嘅CBF陷阱。簡單嚟講，當喺海外商戶嘅網站（例如App Store、Google Play、Netflix、Spotify、Airbnb、部份酒店預訂平台／外國航空公司網站）俾港幣找數嘅時候，就會計做「跨境港幣交易」，部份銀行會收返1%左右嘅Cross Border Fee (CBF) 手續費，部份銀行就會唔計回贈，但亦有啲銀行係無手續費仲要照計回贈。小編以前年少無知，就試過買機票萬幾銀中咗CBF，結果1蚊回贈都無。

相比起海外實地簽賬，海外網上簽賬就比較複雜，因為好難即時判斷到個網站究竟係香港商戶定係海外商戶，例如有啲主要外國航空公司同酒店booking網站其實有喺香港註冊做商戶，所以用港幣簽都唔會中CBF。

喺主要銀行入面，滙豐、恒生、渣打、中銀、東亞、DBS、信銀、大新、AEON、Mox等都係會收返0.8%至1.95%不等嘅CBF手續費；另外，東亞同Citi都係無回贈／唔計額外回贈。所以如果要網上簽港幣，而又驚個網係海外商戶嘅話，就要自己計返扣咗手續費仲有幾多回贈，詳細可以參考港幣網上簽賬攻略。

商戶註冊地

最後加多個商戶註冊地嘅list喺到，方便大家分返啲商戶係本地定海外，如果個網唔係HK但又收你港幣嘅話就要小心揀卡碌啦！但下列資料未必準確，只供參考，大家可以Ctrl+F搵返。