信用卡年費點waive？打電話豁免年費教學攻略

#信用卡年費 #信用卡waive年費 #信用卡點waive年費 #waive年費教學

（最後更新：2020年7月）

依家市面上出咗好多高回贈嘅信用卡，但偏偏就好多人寧願繼續用啲無咩回贈嘅卡，其中一個主要原因就係好多人都好驚俾銀行收年費。尤其係平時少留意開信用卡嘅人，好多時第一句就係問張信用卡係咪永久免年費。但其實，依家市面上絕大部份嘅信用卡，即使有年費，都係打個電話就waive到！就算真係waive唔到，只要cut咗張卡就唔會收錢！如果你真係好驚唔小心俾人收咗年費都唔知，雖然唔建議，但都可以睇下呢篇永久免年費信用卡攻略。

預繳年費

首先同大家清一清concept先。信用卡嘅年費，一律都係預繳，即係預先俾定下年嘅錢。所以理論上，張卡一批嗰下其實就已經即刻要俾年費。但除咗幾張尊尚級信用卡，基本上所有信用卡都係最起碼會免你頭一年年費。所以當你張卡開夠一年要收年費嘅時候，銀行其實係收緊你下一年年費；咁就算真係waive唔到，你只要cut咗張卡，就即係你唔會用佢第二年嘅服務，所以亦無須要交年費。

打電話免年費

所以如果唔想俾人收年費，大家就記住每個月都一定要望一望張月結單（其實就算張卡無年費都要望，如果唔係隨時俾人盗用咗都唔知）。當你見到月結單上面要收你年費嘅時候，除非你係用嗰幾張尊尚信用卡，如果唔係就一律都係打上銀行信用卡hotline處理。

好多銀行嘅hotline，直頭會有個制俾你揀豁免信用卡年費，然後就電腦處理自動豁免，連真人都唔使經。如果你㩒完呢個制，電腦系統話豁免唔到都好，都可以再駁比真人聽去處理。你只要禮貌咁同佢講話想waive年費，佢就通常都會waive俾你。如果waive唔到，通常都係因為銀行policy問題，咁就請你好好放低，禮貌咁同CS講話想cut卡。Cut咗卡，過完冷河又可以再食過迎新，其實賺得隨時仲多過你keep住張卡（信用卡迎新攻略）！

年費豁免條件

其實有啲信用卡係寫明咗豁免年費條件，通常一係就要簽夠幾錢，一係就要開銀行戶口。例如張AE Blue Cash就寫明每年簽$25,000先有得免年費，張渣打Simply Cash就寫明要優先理財／Premium理財／渣打紅利出糧戶口客戶先有得免年費。但就算達成唔到條件，打上去都一樣可能waive到！

要俾年費信用卡

市面上有幾張尊尚信用卡，無論係點都無面俾一定要收年費，仲要係連第一年都無得免，包括AE白金卡（細頭）、AE白金信用卡（大頭）、Citi Prestige同Citi Ultima等。但呢啲卡多數都係主打飛行里數，比較少人會用嚟玩現金回贈。

同時值得一提嘅係，今年渣打都唔知點解企得好硬，張Simply Cash如果唔係優先理財／Premium理財／渣打紅利出糧戶口客戶，好多時都唔肯免第二年年費。但都係嗰句，waive唔到都唔使留戀，cut咗佢再食迎新好過！

小結

睇完呢篇文，就唔好再因為張卡有年費就唔去開咁傻豬啦！會賺少好多現金回贈㗎！即刻去睇吓邊張卡玩現金回贈最抵啦！