[海外提款攻略] 咪旨意銀聯！歐洲旅遊必備Plus/Cirrus提款卡！

#銀聯歐洲提款 #Unionpay歐洲提款 #銀聯歐洲㩒錢 #Plus歐洲提款 #Cirrus歐洲提款 #銀聯歐洲櫃員機 #銀聯歐洲提款機 #銀聯英國提款 #銀聯德國提款 #銀聯法國提款 #銀聯荷蘭提款 #銀聯比利時提款 #銀聯西班牙提款 #銀聯葡萄牙提款 #銀聯意大利提款 #銀聯挪威提款 #銀聯丹麥提款 #滙豐Plus提款 #恒生Plus提款 #Citibank Plus提款 #渣打Cirrus提款 #中銀Plus提款 #東亞Plus提款 #海外提款手續費

（最後更新：2022年8月）

自從香港嘅提款卡全部由磁帶改做晶片後，大部份銀行都已經將預設嘅提款網絡由Plus同Cirrus改成銀聯Unionpay。對於呢個改變，一般市民喺香港，甚至係東亞地區提款，都應該唔會覺得有咩唔方便。但係，銀聯喺歐洲地區嘅覆蓋，相比起Plus同Cirrus就勁差；就算部提款機受理銀聯卡，都唔等於可以成功撳到錢；或者就算你用間銀行喺當地有分行，部櫃員機都未必會接納你張香港提款卡！

銀聯

要喺歐洲用香港嘅提款卡，首先，當然係要喺香港嘅櫃員機或者網上理財設定開啟海外提款功能。搞掂之後，就要預先確認你所到嘅地方嘅銀聯ATM位置，呢樣嘢可以喺銀聯網站搵到。先假設你咁好彩喺要去嘅地方附近搵到銀聯ATM，但仲有一關要過，就係部ATM要受理晶片卡！歐洲好多舊款提款機，仍然停留喺只係受理磁帶卡嘅階段，讀唔到晶片，亦因為咁可能處理唔到你嘅提款卡（網上流傳可以用膠紙遮咗提款卡晶片迫部ATM讀磁帶，但未經證實，風險自負）。亦因為咁，喺銀聯網站搵ATM嘅時候，最好剔埋「受理晶片卡」嗰欄。但根據筆者喺網站入面嘅搜尋結果，喺荷蘭、比利時、德國、葡萄牙等地，都無任何受理晶片卡嘅銀聯ATM，亦即係用銀聯晶片卡好大可能撳唔到錢。

Visa / Mastercard

相比起用銀聯個網絡搵ATM，更好嘅辦法，當然就係用Plus（對應Visa）或者Cirrus（對應Mastercard）嘅網絡！一個較為快捷嘅方法，係將你嘅Visa或者Mastercard信用卡連結去你嘅銀行戶口；咁就可以喺歐洲嘅Plus或者Cirrcus ATM插入信用卡，再揀由銀行戶口入面攞錢。用信用卡提款服務前，亦記得要先設定好信用卡密碼。

但呢個方法都有一個問題，就係部份歐洲嘅ATM係讀取唔到信用卡連接嘅銀行戶口資料，所以無得喺銀行戶口攞錢。如果用呢個方法撳錢嘅話，一定要留意部ATM有無比你揀喺銀行戶口攞錢，唔係就會變咗直接喺信用卡戶口提款嘅現金透支，要俾貴一貴嘅手續費同利息！歐洲嘅ATM，以Plus同Cirrus網絡居多，一般都唔使專登去搵；但如果有需要，亦可以去Visa網站或者Mastercard網站搵櫃員機位置。

Plus / Cirrus

最穩陣嘅做法，就係直接同銀行申請一張Plus／Cirrus嘅提款卡或者Debit Card。但而家香港好多銀行（包括恒生、中銀、東亞等）都已經唔再發行Plus同埋Cirrus提款卡。小編會推薦大家去開個Citi Plus或者HSBC One銀行戶口，兩個戶口都可以申請到行Mastercard／Cirrus網絡嘅Debit Card，仲要係可以手機開戶，兼無最低存款要求！

睇到呢到，可能好多人會覺得為咗一次旅遊搞咁多嘢要開銀行戶口好麻煩。但事實上，小編會做足準備嘅原因，係因為歐洲嘅大城市普遍扒手猖獗，現金好容易會被人偷被人搶。小編嘅朋友之中，就有人經曾經因為銀包被人偷咗，喺無cash嘅情況下迫住提早完結行程。但如果做多一重保險措施，旅遊嘅時候將一張香港提款卡放喺貼身嘅防盗腰包或者其他地方，咁就就算被人偷嘢都可以去㩒錢繼續原有行程。

提款手續費方面，一般批卡機構同銀行都會收取一定費用，包括兌換手續費（約1%）同提款手續費（大概幾十蚊）。收費詳情同匯率，要分別同個別銀行確認。但其實，由於經由ATM提款嘅匯率一般好過找換店，就算加埋手續費，唱錢成本亦都係同去找換店唔差得幾遠。

信用卡

值得一提嘅係，歐洲嘅信用卡文化非常流行；就算係小額消費，都通常會接受用信用卡俾錢，咁就唔使帶咁多現金喺身，就算真係俾人偷嘢都無咁傷。其中，一啲回贈率比較高嘅信用卡，仲可以喺抵銷海外簽賬手續費之餘額外再賺取可觀嘅回贈，詳情可以參考呢篇海外簽賬攻略。