滙豐HSBC Debit Card攻略 – 多貨幣扣賬卡、海外簽賬免手續費、唔使再唱錢！

#滙豐HSBC Debit Card #滙豐HSBC One扣賬卡提款卡 #滙豐Debit Card卡優惠 #滙豐Debit Card現金回贈  #滙豐Debit Card好唔好 #滙豐Debit Card年費豁免 #去旅行唱錢定用Debit Card

想開Debit Card又唔知開邊張好？即睇Debit Card攻略！

（最後更新：2021年2月）

滙豐呢張講咗好耐嘅Multi Currency Debit Card，終於都推出咗啦！呢張卡主打支援多種貨幣，要用外幣嘅時候可以直接扣返銀行入面個外幣戶口，亦無任何手續費，仲有0.4%現金回贈！

香港一向都無咩銀行搞Debit Card，但其實呢樣嘢喺外國係好興。所謂Debit Card，就即係碌卡嘅時候會類似EPS咁直接扣你銀行存款（Debit Card詳解），而唔係當喺銀行借錢，咁就少咗卡數呢個煩惱。而呢張多貨幣扣賬卡，就更加識自動扣返相應外幣戶口嘅存款：例如如果你一早喺銀行唱落咗一堆yen，咁喺日本網掃貨，或者去旅行喺日本碌卡／㩒錢嘅時候，張卡就會自動喺日元戶口扣數。

呢張Debit Card只要喺滙豐綜合理財戶口客戶就開得，包括學生都無問題，亦唔使交任何文件。只要入返手機流動理財或者網上理財，就可以即刻開到卡。

滙豐Debit Card卡賣點

• 簽賬0.4%現金回贈
• 支援12種貨幣
• 海外簽賬無手續費（海外簽賬信用卡攻略）
• 全球滙豐櫃員機提款免手續費（海外提款攻略）

滙豐Debit Card無論係本地、網上定外幣簽賬，都有0.4%現金回贈。而呢張卡亦支援港元、美元、英鎊、日元、人民幣、歐元、泰銖、澳元、新西蘭元、新加坡元、加拿大元及瑞士法郎共12種貨幣，只要你銀行戶口入面有相應外幣佢就會識自動扣，如果無／唔夠嘅話佢就會轉用港紙結算，當中無任何外幣簽賬手續費。由於Mastercard個匯率本身已經勁貼價，再加埋張卡有現金回贈，所以去旅行直接碌呢張卡喺大多數情況下係會抵過去找換店唱錢（但識玩嘅話碌信用卡仲抵，可以睇返海外簽賬信用卡攻略）。

注意事項

• 無咩優惠，得0.4%現金回贈

呢張卡雖然係啱啱推出，但暫時就唔見有咩特別優惠。張卡本身0.4%現金回贈，同信用卡比就一定係低好多，所以簽本地簽賬就真係唔會揀佢（最抵現金回贈信用卡攻略）。

滙豐Debit Card小檔案

• 本地簽賬：0.4%回贈
• 海外簽賬：0.4%回贈（無手續費）
• 年費：永久免年費
• 開戶要求：滙豐綜合理財客戶