咩係Debit Card扣賬卡？同信用卡有咩唔同？同EPS／Prepaid Card又有咩分別？

#咩係Debit Card #咩係扣賬卡 #咩係Prepaid Card #咩係預繳卡

近期多間虛擬銀行陸續推出Debit Card，仲要做咗好多推廣優惠（Debit Card優惠攻略），成功造就咗一股Debit Card嘅熱潮。咁大家又知唔知Debit Card究竟係咩嚟？同信用卡有咩唔同？同EPS同Prepaid Card又有咩分別？等小編同大家解釋下啦！

咩係Debit Card？

平時我哋用嘅Credit Card，之所以叫「Credit」，係因為每次簽賬嘅時候都等於向銀行借緊錢。如果一個唔覺意使突咗無錢找卡數，就要向銀行還息。而Debit Card就係Credit Card嘅相反，中文叫做扣賬卡，顧名思義，就即係每次用嘅時候都係直接喺我哋銀行戶口扣錢，道理大致上同EPS相同。如果用Debit Card嘅話，就無咗「先使未來錢」嘅問題，更加唔會有差落一身卡數嘅風險。

對於銀行嚟講，Debit Card係一項無咩錢賺嘅業務，唯入嘅收入就係交易手續費，所以亦解釋咗點解香港傳統銀行多數都只係有興趣做信用卡。咁Debit Card同EPS又有咩分別呢？簡單嚟講，EPS係香港土炮嘅產物，基本上只係喺香港實體零售層面用到；而Debit Card就同信用卡一樣係由Visa、Mastercard呢啲國際批卡機構所發行，所以係通行全世界同可以用嚟上網買嘢，基本上凡係收Visa/Mastercard嘅地方就會用到。而Debit Card通常亦會兼任埋提款卡嘅功能，所以一張卡就可以用晒嚟提款、簽賬。

咁Debit Card定信用卡好用？

其實呢條問題好難一概而論。如果你本身對自己使錢嘅自制能力信心唔大，驚差落一身卡數，又或者因為無收入證明／TU差而好難開到信用卡（無入息證明開信用卡攻略），就當然係適合開Debit Card。但因為信用卡對銀行嚟講係賺得多好多錢嘅業務，所以一般銀行都會更加肯扔錢落信用卡產品做優惠做回贈。撇除依家虛擬銀行啱啱launch Debit Card所做嘅優惠唔計，信用卡嘅回贈同推廣一般係比Debit Card多好多；所以如果對自己有信心可以每期full pay找卡數，用信用卡係會更著數賺到更多回贈（最佳現金回贈信用卡組合）。另外，用信用卡仲有一個bonus，就係可以build up一個良好嘅信貸紀錄（當然前提係要準時找卡數），咁第時要買車買樓做按揭都可以攞到更好嘅offer。

咁Prepaid Card又係咩嚟？

相比係Debit Card，Prepaid Card可以話係一個更冷門嘅產品，除咗中學生之外實在好少人會用。Prepaid Card中文係預付卡，顧名思義，就係首先要入咗錢落Prepaid Card賬戶到，先可以用Prepaid Card去使錢，可以話係一張行Visa/Mastercard網絡嘅八達通。由於Prepaid Card賬戶同銀行賬戶係分開，所以理論上係比Debit Card更加安全，但前提係每次簽賬前都要預先入定錢。市面上部份Prepaid Card亦會有提供類似八達通自動增值嘅功能，可以預設一個銀碼，當Prepaid Card賬戶唔夠錢嘅時候就自動由銀行賬戶增值。由於Prepaid Card係由Visa、Mastercard呢啲國際批卡機構所發行，所以同樣基本上凡係收Visa/Mastercard嘅地方就會用到。