海外簽賬DCC手續費陷阱詳解！網購都會中招！App Store、Netflix、Spotify、Airbnb最高危！

#App Store、Google Play、Netflix、Spotify、Airbnb信用卡1%手續費 #動態貨幣轉換 #Dynamic currency conversion #海外簽賬手續費 #外幣簽賬手續費

（最後更新：2021年6月）

今次呢篇文，就同大家拆解下海外商戶DCC動態貨幣轉換呢個手續費嘅陷阱！

外幣簽賬有手續費，相信好多人都知，但市面上信用卡頂到盡都只係會收2%，只要搵張高回贈嘅信用卡簽就已經可以賺突，好似匯豐Visa Signature咁，詳細可以睇返海外簽賬信用卡攻略。好多人為咗避免呢個手續費，如果有得揀嘅話會用返港幣嚟去海外商戶簽賬／網購，咁你就好大機會中伏啦！

呢個DCC陷阱，以下會分兩part拆解，分別係海外實地簽賬（即係去旅行嗰時喺外國鋪頭簽卡）同埋海外網上簽賬（即係App Store、Netflix、Spotify、Airbnb呢啲）。

海外實地簽賬

簡單嚟講，喺外地商戶碌Visa/Mastercard嘅時候，可以揀用外幣或者港幣做結算交易，而以港幣結算嘅交易就叫做DCC。驟眼睇落，用港幣結算好似幾好；但其實商戶同銀行一般夾埋會向DCC交易收返最少4%嘅手續費！所以，喺外地碌卡嘅時候，一定要以外幣直接結算，千祈唔好墮入DCC陷阱！一般嚟講，只要喺俾錢嘅時候同個店員講以當地貨幣埋單（Pay in USD/EURO etc.），就可以避免到DCC陷阱，而簽完之後張單係唔應該會見到有港幣。

海外網上簽賬

相比起海外實地簽賬，海外網上簽賬就複雜啲，因為好難即時判斷到個網究竟係香港商戶定係海外商戶，例如唔少主要外國航空公司同酒店booking網站其實都有喺香港註冊做商戶。而如果去咗海外商戶嘅網站俾港幣找數嘅話，部份銀行會收返1%左右嘅手續費，部份銀行就會唔計回贈。筆者以前年少無知，就試過買機票萬幾銀用咗DCC俾錢，結果1蚊回贈都無，諗起都仲覺得蝕咗俾銀行。

簡單而言，喺主要銀行入面，渣打、中銀、大新、中信等都係會收返0.8%至1%不等嘅DCC手續費，所以用佢哋啲信用卡簽App Store、Google Play、Netflix、Spotify、Airbnb等等海外商戶係要俾手續費。另外，星展DBS同花旗Citi雖然唔收手續費，但DCC係無現金回贈。所以如果要網上簽港幣，而你又唔肯定個網係咪海外商戶嘅話，最好就避免上述銀行嘅信用卡，用匯豐Red卡食4%回贈就一定無死，詳細可以睇返網購信用卡攻略。而如果個網係收外幣嘅話，就首選揀「賞世界」嘅匯豐VS食高達5.6%回贈，無嘅話就都係用返匯豐Red卡食4%回贈，留意返呢2張卡外幣都係要扣返1.95%手續費。

商戶註冊地

最後加多個商戶註冊地嘅list喺到，方便大家分返啲商戶係本地定海外，如果個網唔係HK但又收你港幣嘅話就要小心揀卡碌啦！但下列資料未必準確，只供參考，大家可以Ctrl+F搵返。俾多個tips大家，通常就咁上網碌卡中本地嘅機會係會大過用App，好似Agoda咁，小編次次就咁上網book返單都係出HK無試過出SG同GB。