中銀大灣區鑽石信用卡攻略 – 手機俾錢、支付寶轉賬/繳費即回4%！

#BOC中銀信用卡 #中銀信用卡優惠 #中銀信用卡積分回贈 #中銀信用卡迎新 #中銀信用卡好唔好 #大媽卡 #Apple Pay信用卡回贈 #Android Pay信用卡回贈 #Samsung Pay信用卡回贈 #支付寶信用卡回贈 #Alipay HK信用卡回贈 #中銀Alipay HK #中銀大灣區年費豁免

（最後更新：2020年7月）

今次介紹呢張中銀雙幣鑽石卡<大灣區一卡通>（留意唔好開錯白金卡），雖然唔係好多人識，同埋個名好重強國味，但其實攞嚟做小額交易／玩支付寶chok回贈都勁好用！張卡依家做緊個「手機支付簽賬4%現金回贈」優惠，一路做到2020年12月31號，只要用手機支付簽賬，就有4%回贈！呢個4%嘅回贈，以小額交易嚟講，除咗中銀Sogo VS卡嘅5%就係佢最高！而且佢勁過Sogo卡嘅地方，係攞嚟玩支付寶轉賬同繳費都食到！即係交水電煤都有4%呀（詳細攻略）！我明白好多人可能會唔想用中銀，但係咁高嘅回贈率下，其實你每簽一次佢就蝕一次錢！實行食窮中銀！但當然前提係你個個月要full pay找卡數唔好俾佢收利息。

中銀雙幣鑽石卡<大灣區一卡通>賣點

• 每月首$2,500手機支付4%回贈
• 海外簽賬無手續費
• 銀聯卡專享禮遇（見下文）
• 雙幣卡、「大灣區」支付及繳費
• 永久免年費

正如上文所講，4%嘅手機支付回贈真係除咗中銀Sogo VS嘅5%之外就係佢最高，同埋呢張卡嘅手機支付唔只剩係計Apple Pay、Google Pay同Samsung Pay，係包埋用支付寶、微信支付、BoC Pay、雲閃付呢啲電子錢包去鋪頭買嘢，最筍係連支付寶轉賬同繳費都賺到4%，即係連交水電煤費都賺到4%！。玩支付寶就唔駛問一定用呢張卡啦，而平時喺鋪頭拍手機俾錢，我就會喺用爆咗中銀Sogo VS嘅$2,000 quota之後轉用呢張卡繼續。只要你入咗張卡落部手機度，就凡係收paywave／支付寶嘅鋪頭都食到成4%，即係超市、便利店、衫鋪鞋鋪、中低價餐廳呢啲鋪頭全部通殺，真係抵到爛（但App內用Apple Pay無5%，如Foodpanda）！呢個優惠每月嘅回贈上限係$100，換言之簽$2,500就會爆煲，所以最啱攞嚟做小額交易！

迎新禮遇

• 新客2個月內指定流動支付單一簽賬滿$30回$10，上限回$300
• 新客網上申請額外回$100

中銀嘅迎新，就例牌無話好吸引，今期呢個仲要特別雞肋。中銀大灣區一卡通依期個迎新做到2020年12月31日，中銀信用卡全新客戶（過往一年無中銀信用卡）出卡後2個月內以指定流動支付方式（包括BoC Pay、雲閃付App、Apple Pay、Google Pay、SamsungPay、WeChat Pay及Alipay HK）單一零售簽賬滿$30回$10，2個月內最多可以回$300*。另外，只要係網上申請張信用卡，就可以再回多$100。

睇條款呢個迎新應該係要攞部手機真係喺鋪頭簽賬先食到，但根據坊間經驗，中銀係唔多識分支付寶交易究竟係轉賬定真係消費，而小編之前chok支付寶轉賬亦都係成功食到中銀卡迎新；至於依家仲得唔得，就真係要靠大家幫手試試update返小編。

中銀雙幣鑽石卡<大灣區一卡通>：立即申請

伏位

• 銀聯未必到到都有得簽
• 基本回贈率得0.4%好低
• 手機支付4%回贈每個月簽$2,500就爆

除咗個迎新，呢張卡其實無咩伏位，定位非常清晰，就係攞嚟拍手機俾錢同玩支付寶。唯一嘅缺點，就係每個月$2,500嘅限額唔係太夠喉。但其實中銀張i-Card一樣有做緊相似嘅手機支付優惠，雖然限額再少啲，但都一樣有4%回贈！如果用完中銀Sogo VS卡嘅$2,000拍手機 quota，又玩完呢張卡嘅拍手機／支付寶$2,500 quota，就可以轉玩中銀i-Card同i-Card虛擬卡。如果真係連兩張i-Card都玩埋都唔夠，就可以開埋張中銀大灣區白金卡，同呢張鑽石卡玩法一模一樣，但就得2%回贈。依家中銀堆信用卡，唯一真正見得人嘅賣點就真係得返手機支付⋯⋯

銀聯卡尊享禮遇（只限雙幣鑽石卡）

LoungeKey大中華機場貴賓室服務
連續2個月內合計簽夠$12,000，可以連同親友預約享用3次LoungeKey大中華機場貴賓室服務，涵蓋中港澳台130多個Lounge。詳細請閱推廣網頁。

名貴轎車機場接送禮遇
累積零售簽賬滿$3,000，交易次數唔多過兩次，可以$250享用轎車機場接送服務，包括香港、北京、上海機場往返市區，同深圳機場往返香港。詳細請參閱推廣網頁。

雙幣卡、大灣區支付及繳費

話明係雙幣卡同<大灣區一卡通>，呢張卡其中一個主打當然就係方便你去強國消費、仲可以喺「大灣區」到直接用嚟搭車同繳費。我就已經好耐無去過強國，大家如果有興趣可以睇返官網嘅詳細資料。

中銀雙幣卡<大灣區一卡通>鑽石卡小檔案

• 手機支付（包括支付寶轉賬／繳費）：4%回贈（每月首$2,500）
• 其他簽賬：$1=1積分，相等於0.4%回贈
• 八達通自動增值：$1=1積分，相等於0.4%回贈
• e-Banking繳費：$1=1分，相等於0.4%回贈（每月首$10,000）
• 永久免年費
• 年薪要求：$200,000

中銀雙幣鑽石卡<大灣區一卡通>：立即申請

*受條款及細則約束：手機支付回贈T&C、迎新T&C