2022出糧戶口攻略 – SI自製出糧教學+出糧戶口優惠比較(Citi/渣打/滙豐/恒生/中銀/建行/大新)

#出糧戶口優惠比較 #SI出糧戶口比較 #出糧戶口迎新 #SI自製出糧 #SI假出糧 #Standing Instruction出糧 #自動轉賬出糧

想開虛擬銀行戶口又唔知揀邊間好？即睇虛擬銀行全攻略！

想做活期/定期存款但又唔知邊間高息？即睇高息港元存款攻略！

（最後更新：2022年11月）

除咗喺日常消費用信用卡賺現金回贈同食迎新之外，另一個好輕易可以賺到銀行回贈嘅方法，就係開個出糧戶口食迎新優惠！只要搵公司HR遞張form，1蚊都唔使出，就可以賺銀行一筆。依家好多銀行，甚至會連SI轉賬都計做出糧，即係連搵公司HR都唔使，只要自己set個自動轉賬過數去新戶口，就可以照賺銀行優惠！咁樣就即使係支票／現金出糧嘅朋友都一樣可以賺到回贈！以下呢篇文，將會同大家比較下市面上有咩出糧戶口優惠最抵！

SI簡介

首先介紹返咩係SI先，佢個全名係Standing Instruction，中文名係常行指示。簡單嚟講，SI就係喺你本身銀行戶口set個類似自動轉賬，然後佢每個月就會自動過數去第二個銀行戶口，即係好似自動轉賬找卡數咁。而某啲銀行係會將呢啲透過SI轉賬入嚟嘅錢當做出糧，咁我地就可以透過SI過數將喺另一間銀行嘅錢轉去新戶口，從而食埋新戶口嘅出糧優惠。當你SI過完數，你又可以將筆錢手動轉返去本身個銀行戶口，咁只要有一筆閒錢就可以無限loop食盡SI出糧優惠。

SI教學

了解咗SI嘅原理之後，就講下SI詳細要點做。要設立SI射錢去第二間銀行，就要去返你本身用開間銀行到做；一般打電話上hotline，同CS講要做standing instruction每個月指定日子過數去第二個銀行戶口佢就識搞（例如恒生），甚至有啲銀行網上理財已經可以搞掂（例如滙豐），真係搞唔到嘅話就落分行搵櫃台職員，但部份銀行可能會收返幾十蚊手續費。留意返，SI由扣數去到第二間銀行入賬，要預返兩三個工作天，所以千祈唔好set月尾過數，如果唔係第二個月先到賬嘅話就會斷咗出糧紀錄。

心水清嘅朋友，睇到呢part可能都會諗到啲再進階啲嘅玩法。例如首先用恒生真出糧，再SI轉錢去Citi，就可以同時食晒兩間銀行嘅出糧offer，甚至一次過同時SI去幾間銀行玩晒咁多個SI出糧offer都仲得。如果唔想煩要手動轉錢，仲可以用SI做個自動轉錢嘅cycle，月頭恒生SI過數去Citi，然後月中Citi SI又過返數去恒生，咁就一筆閒錢可以自動玩到夠期添！

出糧戶口迎新優惠

銀行	SI	最低門檻	最高回贈	備註
渣打	計	2萬SI	$2,000	連同其他獎賞高達$24,500回贈
建行	計	1萬SI	$2,000	連同其他獎賞高達$21,350回贈
花旗	計	3萬SI + 150萬存款	$1,000	連同其他獎賞高達$21,280回贈
大新	計	5萬SI 1萬真出糧	$600	連同其他獎賞高達$3,340回贈
恒生	X	1萬真出糧	$800	連同其他獎賞高達$13,000回贈
滙豐	X	1萬真出糧	$500	連同其他獎賞高達$1,800回贈
中銀	計	1萬SI	$800	連同其他獎賞高達$1,200回贈 公務員真出糧高達$2,200回贈

如果係SI出糧，又唔想困住咁多錢係銀行，小編會建議最易玩係渣打同建行。

渣打銀行 Standard Chartered

今期渣打出糧戶口優惠做到2022年12月31日，新開立出糧服務並以公司自動轉賬／SI方式每月出糧達$2萬或以上，並符合指定要求，可享以下回贈：

每月薪金	現金回贈
150,000或以上	$2,000
80,000至149,999	$900
50,000至79,999	$400
20,000至49,999	$200

話明SI出糧都計，識玩就梗係做$15萬SI食盡$2,000回贈！再連同開戶及其他獎賞，最多可以賺到高達$24,500回贈，優惠要求及詳情可以參考渣打出糧戶口攻略。

建行(亞洲) CCBA

今期建行出糧戶口優惠做到2022年12月31日，新開立出糧服務並以公司自動轉賬／SI方式每月出糧達$1萬或以上，並符合指定要求，可享以下回贈：

客戶類別	最低存款額	現金回贈
貴賓晉裕	$5,000,000	$2,000
貴賓理財	$1,000,000	$1,500
智選理財	$100,000	$1,000
一般客戶	–	$350

再連同開戶及其他獎賞，最多可以賺到高達$21,350回贈，優惠要求及詳情可以參考建行出糧戶口攻略。

花旗銀行 Citibank

今期花旗Citigold出糧戶口優惠做到2022年12月31日，新開立銀行戶口並以公司自動轉賬／SI方式每月出糧達$3萬或以上，另外存款維持至少$150萬，並符合指定要求，可享以下回贈：

每月薪金	現金回贈
80,000或以上	$1,000
50,000 – 79,999	$500
30,000 – 49,999	$300

話明SI出糧都計，識玩就梗係做$8萬SI食盡$800回贈！再連同Citigold開戶及其他獎賞，最多可以賺到高達$38,800回贈！由2022年12月6日至2023年1月6日6PM，新客經本網成功申請額外送高達$3,500 Apple禮品卡／city'super禮品卡／Klook禮品卡*！優惠要求及詳情可以參考Citi出糧戶口攻略。

大新銀行 Dah Sing Bank

今期大新出糧戶口優惠做到2022年3月31日，新開立銀行戶口並以公司自動轉賬／SI方式每月出糧$1萬或以上，並符合指定要求，可享以下回贈：

每月薪金	真出糧	SI出糧
80,000或以上	$600	$250
50,000 – 79,999	$200	$100
30,000 – 49,999	$100	–
10,000 – 29,999	$100	–

再連同開戶及其他獎賞，最多可以賺到高達$3,340回贈。即日起至2022年3月31日，新客經本網開立YOU Banking優易理財，仲額外送$150超市禮券！優惠要求及詳情可以參考大新出糧戶口攻略。

恒生銀行 Hang Seng Bank

今期恒生出糧戶口優惠做到2022年3月31日，新開立出糧服務並以公司自動轉賬方式每月出糧達$1萬或以上，並符合指定要求，可享以下回贈：

每月薪金	現金獎賞
$80,000或以上	$800
$50,000 – $79,999	$500
$30,000 – $49,999	$300
$10,000 – $29,999	$200

再連同開戶及其他獎賞，最多可以賺到高達$13,000回贈，優惠要求及詳情可以參考恒生出糧戶口攻略。留意返，恒生呢個優惠只會計算由僱主公司戶口以自動轉賬方式直接存入嘅薪金，其他SI、支票、轉賬、存款、現金等出糧方式全部唔計。

滙豐銀行 HSBC

今期滙豐One迎新下嘅出糧戶口優惠做到2022年1月31日，新開立出糧服務並以公司自動轉賬方式每月出糧達$1萬或以上，並符合指定要求，可享以下回贈：

每月薪金	現金獎賞
$20,000或以上	$500
$10,000 – $19,999	$200

再連同開戶及其他獎賞，最多可以賺到高達$1,800回贈，優惠要求及詳情可以參考滙豐One戶口攻略。留意返，滙豐呢個優惠只會計算由僱主公司戶口以自動轉賬方式直接存入嘅薪金，其他SI、支票、轉賬、存款、現金等出糧方式全部唔計。

中銀

今期中銀出糧戶口優惠做到2021年3月31日，新開立出糧服務並以公司自動轉賬／SI方式每月出糧達$1萬或以上，並符合指定要求，可享以下回贈：

每月薪金	現金回贈
	中銀理財	智盈理財	自在理財
$80,000或以上	$800	$500	$200
$30,000 – $79,999	$500
$10,000 – $29,999	$200	$200

再連同開戶及其他獎賞，最多可以賺到高達$1,200回贈，如果係公務員真出糧仲可以賺到高達$2,200回贈。優惠要求及詳情可以參考中銀出糧戶口攻略。