中銀Sogo VS信用卡攻略 – Apple Pay/Android Pay拍手機俾錢即回5%！

#BOC中銀信用卡 #中銀信用卡優惠 #中銀信用卡積分回贈 #中銀信用卡迎新 #中銀信用卡好唔好 #Apple Pay信用卡回贈 #Android Pay信用卡回贈 #Samsung Pay信用卡回贈 #中銀Sogo卡年費豁免

（最後更新：2020年7月）

今次介紹呢張中銀崇光Visa Signature卡（留意唔好開錯白金卡），雖然無咩人識，但其實攞嚟做小額交易係超級屈機！張卡依家做緊個「 手機支付5%現金回贈優惠」，一路做到2020年12月31號，只要用Apple Pay／Google Pay／Samsung Pay作零售簽賬（即係喺鋪頭拍手機俾錢），就有成5%回贈！呢個5%嘅回贈，以小額交易嚟講，可以話係全城至高回贈！我明白好多人可能會唔想用中銀，但係咁高嘅回贈率下，其實你每簽一次佢就蝕一次錢！實行食窮中銀！但當然前提係你個個月要full pay找卡數唔好俾佢收利息。

中銀崇光Visa Signature卡賣點

• 每月首$2,000 Apple Pay／Google Pay／Samsung Pay零售簽賬5%回贈
• SOGO指定商戶簽賬5%回贈
• SOGO超市逢週一95折
• 永久免年費

呢張卡叫得Sogo VS卡，想當然係Sogo買嘢係會有折扣啦，而呢張卡就做到5%回贈*，但都唔係適用喺所有商戶，詳細都要睇返張商戶名單。但講真，一般人有幾何會去Sogo買嘢？所以呢張卡嘅主打賣點，始終都係Apple Pay／Google Pay／Samsung Pay簽賬有成5%回贈*！即係只要你入咗張卡落部手機度，凡係收paywave嘅鋪頭都食到成5%，即係超市、便利店、衫鋪鞋鋪、中低價餐廳呢啲鋪頭全部通殺，真係抵到爛！呢個優惠每月嘅回贈上限係$100，換言之簽$2,000就會爆煲，所以最啱攞嚟做小額交易！

迎新禮遇

• 迎新二揀一：
  • 新客2個月內簽$5,000回$500 Sogo現金券
  • 新客2個月內指定流動支付單一簽賬滿$30回$10，上限回$300
• 新客網上申請額外回$100

中銀嘅迎新，就例牌無話好吸引，今期呢個仲要特別雞肋。中銀Sogo卡依期個迎新做到2020年12月31日，只限中銀信用卡全新客戶（過往一年無中銀信用卡），有兩個選擇。一個係出卡後2個月內碌$5,000零售簽賬送$500 Sogo現金券，另一個係出卡後2個月內以指定流動支付方式（包括BoC Pay、雲閃付App、Apple Pay、Google Pay、SamsungPay、WeChat Pay及Alipay HK）單一零售簽賬滿$30回$10，2個月內最多可以回$300。最後，只要係網上申請張信用卡，一律再回多$100。

睇條款呢個迎新應該係要攞部手機真係喺鋪頭簽賬先食到，但根據坊間經驗，中銀係唔多識分支付寶交易究竟係轉賬定真係消費，而小編之前chok支付寶轉賬亦都係成功食到中銀卡迎新；至於依家仲得唔得，就真係要靠大家幫手試試update返小編。

中銀崇光Visa Signature卡：立即申請

伏位

• 基本回贈率得0.4%好低
• 手機支付5%回贈每個月簽$2,000就爆
• 上網喺海外商戶簽港幣有1% DCC手續費

呢張卡其實無咩伏位，定位非常清晰，就係攞嚟去Sogo買嘢同拍手機俾錢。唯一嘅缺點，就係每個月$2,000嘅限額唔係太夠喉。但其實中銀張大灣區鑽石卡同i-Card一樣有做緊相似嘅拍手機優惠，雖然一樣有限額，但呢兩張卡都講緊有成4%回贈！所以如果用完Sogo張卡嘅$2,000 quota，只要轉過另一張中銀卡就可以繼續玩落去！依家中銀堆信用卡，唯一真正見得人嘅賣點就真係得返拍手機支付⋯⋯另外，如果上網喺海外商戶簽港幣，好似App Store／Netflix／Spotify／Airbnb咁，呢張卡係會收返0.8%手續費，詳情可以睇返呢篇海外簽賬DCC手續費陷阱詳解。

中銀崇光Visa Signature卡小檔案

• Apple Pay／Google Pay／Samsung Pay拍手機零售簽賬：5%回贈（每月首$2,000）
• SOGO指定商戶簽賬：5%回贈
• SOGO超市逢週一95折
• 其他簽賬：$1=1分，相等於0.4%回贈
• 八達通自動增值：$1=1分，相等於0.4%回贈
• e-Banking繳費：$1=1分，相等於0.4%回贈（每月首$10,000）
• 永久免年費
• 年薪要求：$300,000

中銀崇光Visa Signature卡：立即申請

*受條款及細則約束：Sogo優惠T&C、手機支付回贈T&C、迎新T&C